Оғоз аз 1 июли соли 2025 барои воридоти телефонҳои мобилӣ 20 фоиз боҷи гумрукӣ ситонида мешавад

Бақайдгирии телефонҳои мобилӣ тариқи систеемаи  imei.tj пурра ба роҳ монда шуда, ҳангоми воридоти телефонҳои мобилӣ ё планшетҳо пардохти андоз аз арзиши иловашуда 14 фоиз муайян шудааст. Маблағи хироҷҳои гумрукӣ вобаста ба арзиши он (агар то 100 доллар бошад, ягонхел хироҷи гумрукӣ нест ) агар аз 100 долар зиёд бошад ба андозаи 10 доллар муайян шудааст. Оғоз аз 1 июли соли 2025 бошад 20 фоиз боҷи гумрукӣ (вобаста ба арзиши телефонҳои мобилӣ) ситонида мешавад. Дар ин бора имрӯз зимни нишасти матбуотии Хадамоти гумруки назди Ҳукумати Ҷумҳурии Тоҷикистон иттилоъ дода шуд.

Ҳамзамон зикр гардид, ки ҳадафи асосии ворид кардани 20 фоиз боҷи гумрукӣ ин пеш аз ҳама коҳиш додани воридоти телефонҳои мобилӣ мебошад, ки теъдоди воридоти он ба ҷумҳурӣ хеле зиёд гардида буд.

 Иттилоъ дода шуд, ки бақайдгирии телефонҳои мобили моҳи ноябри соли 2023 оғоз гардида,  телефонҳои пеш ворид кардашуда, пурра аз маблағсупории бақайдгирӣ озоданд. Соли 2024 воридоти алоқаҳои барқи ба Тоҷикистон 1 миллиону 285 ҳазору 372 ададро ташкил дода, арзиши он ба 193.5 миллион доллар баробар гардид, ки ин нишондиҳандаи хеле баланди воридот аст.

Дар 6 моҳи соли 2025 ба ҷумҳурӣ 725 ҳазору 203 адад телефонҳои мобили ворид шуда, арзиши он 115.2 миллион долларро ташкил медиҳад.

Султонализода Ёқубҷон

Садои Душанбе