Автор: sado_dushanbe

28 июл таҳти раёсати Президенти Ҷумҳурии Тоҷикистон, Раиси Ҳукумати кишвар, Пешвои миллат муҳтарам Эмомалӣ Раҳмон маҷлиси (https://president.tj/event/news/56386)Ҳукумати Ҷумҳурии Тоҷикистон баргузор гардид.
Дар маҷлис нахуст натиҷаҳои рушди иҷтимоию иқтисодии Ҷумҳурии Тоҷикистон дар нимсолаи якуми соли 2026 ва вазифаҳо барои нимсолаи дуюм баррасӣ гардид.
Президенти кишвар муҳтарам Эмомалӣ Раҳмон бо ишора ба вазъи ноустувори иқтисодиву сиёсии ҷаҳони имрӯза ва эҳтимоли боз ҳам мураккаб шудани он таъкид намуданд, ки ҳифзи устувории макроиқтисодӣ, таъмини амнияти иқтисодӣ, пешгирӣ аз таъсири хавфҳои эҳтимолӣ ва истифодаи пурраи имкониятҳои дохилӣ вазифаи асосии Ҳукумати кишвар мебошад.

28 июл Вазири корҳои хориҷии Ҷумҳурии Тоҷикистон Сироҷиддин Муҳриддин бо Сафири нахустини муқими Фавқулода ва Мухтори Давлати Кувайт дар Ҷумҳурии Тоҷикистон Муҳаммад Рошид Ал-Амирӣ мулоқот намуд. Дар ин хусус аз Вазорати корҳои хориҷии Ҷумҳурии Тоҷикистон хабар доданд.

Зимни мулоқот сафири Давлати Кувайт нусхаи эътимодномаи худро ба Вазири корҳои хориҷии Ҷумҳурии Тоҷикистон супорид.

Пас аз маросими супоридани нусхаи эътимоднома ҷонибҳо роҳҳои таҳким ва густариши ҳамкории Тоҷикистону Кувайтро баррасӣ намуда, аҳаммияти иҷрои тавофуқҳоеро, ки зимни сафари расмии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Давлати Кувайт моҳи ноябри соли 2024 ба даст омада буданд, таъкид карданд.

Ҷонибҳо ҳамчунин барои таҳкими минбаъдаи ҳамкории дуҷониба ва бисёрҷониба изҳори омодагӣ намуданд.

Ба иқтисодиёти кишвар 1,9 миллиард доллар сармояи хориҷӣ ворид гардид
Дар нимсолаи якуми соли 2026 Кумитаи давлатии сармоягузорӣ ва идораи амволи давлатии Ҷумҳурии Тоҷикистон фаъолияти худро дар самти беҳтар намудани фазои сармоягузорӣ, дастгирии соҳибкорӣ ва истифодаи самараноки моликияти давлатӣ натиҷагирӣ намуд. Ҷамъбасти фаъолияти Кумита таҳти роҳбарии раиси Кумита Султон Раҳимзода баррасӣ гардид.
Тибқи маълумоти пешниҳодшуда, дар семоҳаи якуми соли ҷорӣ ба иқтисодиёти кишвар 1 миллиарду 898,1 миллион доллар сармояи хориҷӣ ворид гардидааст, ки нисбат ба ҳамин давраи соли гузашта 23,2 фоиз зиёд мебошад. Ҳаҷми сармояи мустақими хориҷӣ низ ба 187,7 миллион доллар расида, 60,3 фоиз афзоиш ёфтааст.

Шарофиддин Каримов
Садои Душанбе

94,4 фоизи хатмкунандагони Донишгоҳи технологии Тоҷикистон бо ҷойи кор таъмин шуданд

Дар Донишгоҳи технологии Тоҷикистон бо иштироки зиёда аз 50 ширкату корхона «Ярмаркаи ҷойҳои кории холӣ» баргузор гардида, аз 462 нафар хатмкардаи шуъбаи рӯзона 430 нафар бо ҷойи кор таъмин шуданд, ки 94,4 фоизро ташкил медиҳад. Ин нишондиҳанда нисбат ба соли 2025-ум 1,4 фоиз зиёд аст.

Дар ин бора ректори донишгоҳ Зоир Раҳмонзода зимни нишасти матбуотӣ иттилоъ дод. Ҳамчунин, 285 нафар донишҷӯ ҳамзамон бо таҳсил ба фаъолияти меҳнатӣ ҷалб гардида, 15 нафари дигар ба таҷрибаомӯзии музднок сафарбар шудаанд.
Тоҷиддин Сатторзода
Садои Душанбе

Ҳавопаймои нави Boeing 737-8 MAX ба Тоҷикистон ворид карда шуд

Дар доираи таваҷҷуҳ ва дастгириҳои пайвастаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон нисбат ба рушди соҳаи авиатсияи гражданӣ ва тавсеаи имконоти ҳамлу нақли ҳавоӣ нахустин ҳавопаймои нави Boeing 737-8 MAX ба парки ҳавопаймоии ҶДММ «Ширкати ҳавопаймоии Сомон Эйр» ворид гардид.

Ҳавопаймои нави Boeing 737-8 MAX ба шарафи донишманди бузурги тоҷик, файласуф ва табиби маъруфи асримиёнагӣ Абӯалӣ ибни Сино номгузорӣ шудааст.

https://www.facebook.com/share/p/19G53NDkJg/?mibextid=wwXIfr

Донишгоҳи славянии Русияву Тоҷикистон дар соли нави таҳсил бо як қатор навгониҳои муҳим ворид мегардад. Дар ин бора ректори Донишгоҳи славянии Русияву Тоҷикистон Алексей Золотухин баён кард ки аз муҳимтарин дастовардҳо таъсиси факултаи мустақили рӯзноманигорӣ мебошад. Ин иқдом барои рушди соҳаи журналистика, омода намудани мутахассисони мутобиқ ба талаботи замони рақамӣ аҳамияти калон дорад.

Ҳамзамон донишгоҳ ҳафт ихтисоси нави ҷавобгӯ ба талаботи бозори меҳнат-ро пешниҳод намудааст. Ба онҳо ихтисосҳои зерин дохил мешаванд:

– Амнияти иттилоотӣ (Информационная безопасность);
– Идоракунии давлатӣ ва муниципалӣ (Государственное и муниципальное управление);
– Бизнес-информатика;
– Реклама ва робита бо ҷомеа;
– Амнияти иқтисодӣ;
– Тарҷума ва тарҷумашиносӣ (забони чинӣ);
– Тарҷума ва тарҷумашиносӣ (забони олмонӣ).

Муқаддас Машрабён
Садои Душанбе