ЧЕМПИОНАТИ ОСИЁ. Қаиқрони тоҷик Муҳаммадӣ Раҷабов бо медалҳои тилло ва нуқра ба Ватан баргашт
Варзишгари ҷавони тоҷик Муҳаммадӣ Раҷабов аз Чемпионати Осиё оид ба қаиқронӣ бо медалҳои тилло ва нуқра ба Ватан баргашт. Дар ин хусус ба АМИТ «Ховар» дар Маркази таҳлил ва иттилооти Дастгоҳи марказии Кумитаи кор бо ҷавонон ва варзиши назди Ҳукумати Ҷумҳурии Тоҷикистон хабар доданд.
Дар Фурӯдгоҳи байналмилалии шаҳри Душанбе ин варзишгари парчамбардорро намояндагони Кумитаи кор бо ҷавонон ва варзиши назди Ҳукумати Ҷумҳурии Тоҷикистон, ситоди мураббиён, ҷавонон ва хабарнигорони воситаҳои ахбори оммаи мамлакат гарму самимӣ истиқбол гирифтанд.
Муҳаммадӣ Раҷабов дар Чемпионати Осиё, ки дар шаҳри Паттайяи давлати Шоҳигарии Тайланд аз 12 то 16 июн баргузор гардид, дар масофаи 1000 метр каноэ С-1 медали тилло ва дар масофаи 200 метр каноэ С-1 сазовори медали нуқраи Чемпионати Осиё гардид.
