Шоҳмотбози тоҷик чемпиони иёлати Монтанаи ИМА шуд

Донишҷӯ аз Тоҷикистон Расул Назриев чемпиони иёлати Монтанаи ИМА шуд. Ӯ 20 сол дошта, дар курси дуюми Донишгоҳи Монтана аз рӯйи ихтисоси барномасоз таҳсил мекунад. Дар ин бора АМИТ «Ховар» бо истинод ба сомонаи www.montanachess.org хабар медиҳад.

Расул Назриев чанде пеш ба шоҳмотбозӣ ҷиддӣ машғул шуд ва дар муддати кӯтоҳ ин бозиро аз худ карда, дар мусобиқаҳо ширкат варзид. Пеш аз чемпион гардиданаш ӯ дар мусобиқаи кушоди шоҳмот дар Лас Вегас ғолиб омад ва бо шоҳмотбозоне, ки дар раддабандӣ холашон беш аз 2100 буд, рӯбарӯ шуд.

Тамоми марҳилаи интихобиро муваффақона паси сар карда, дар қатори 5 довталаби унвони чемпиони Монтана дохил шуд. Дар ин марҳила ба онҳо чемпиони феълии иёлат Вилтон Стрикленд ҳамроҳ гардид.

Тавре сомонаи расмии Федератсияи шоҳмоти Монтана зикр менамояд, Расул Назриев дар оғози бозӣ аз Дан Матсон шикаст хӯрд ва баъдан пайиҳам чаҳор пирӯзӣ ба даст оварда, ҷоизаи олӣ гирифт. Ин ба ӯ ғалабаи умумиро дар мусобиқа таъмин кард.

Рӯйдоди муҳими мусобиқа пирӯзии Расул Назриев бар чемпиони соли гузашта Вилтон Стрикленд буд.

Мавсими навбатии чемпионати иёлати Монтана оид ба шоҳмот 17 сентябр шурӯъ гардида, мусобиқаи интихобӣ дар чанд марҳила сурат мегирад ва дар онҳо 5 довталаби унвони чемпионӣ муайян мешаванд, ки бо онҳо чемпиони феълӣ Расул Назриев дар даври ниҳоии мусобиқаи соли оянда бозӣ хоҳад кард.

Тавре падари донишҷӯ Саидраҳмон Назриев, собиқ муовини аввали Вазири рушди иқтисод ва савдои Тоҷикистон зикр кард, Расул 20 сол дошта, донишҷӯи курси дуюми Донишгоҳи Монтана буда, фанни информатика ва киберамният меомӯзад ва дар корҳои ҷамъиятӣ фаъолона иштирок менамояд. Ӯ президенти иттиҳоди донишҷӯёни донишгоҳи худ мебошад.