Татбиқи лоиҳаи «Асосҳои рақамии Тоҷикистон» баррасӣ шуд
2 апрел директори Агентии инноватсия ва технологияҳои рақамии назди Президенти Ҷумҳурии Тоҷикистон Хуршед Мирзо бо намояндаи доимии Бонки ҷаҳонӣ дар Ҷумҳурии Тоҷикистон Озан Севимли мулоқот намуд.
Зимни мулоқот ҷонибҳо доир ба фаъолияти Бонки ҷаҳонӣ дар мамлакат, аз ҷумла ҷараёни татбиқи лоиҳаи «Асосҳои рақамии Тоҷикистон» мубодилаи афкор анҷом дода, масъалаҳои марбутро мавриди баррасӣ қарор доданд.
Ҷонибҳо ин лоиҳаро иқдоми муҳимми рушд дар самти иқтисоди рақамии Тоҷикистон арзёбӣ намуда, таъкид карданд, ки лоиҳа бо такмил додани хизматрасониҳои рақамӣ ва баланд бардоштани малакаҳо ба ҳавасмандсозии навовариҳо, беҳтарсозии алоқа ва тавсеаи имконияти ҷамоаҳо мусоидат менамояд.
Инчунин ин ташаббус ба фароҳам овардани имконоти нав дар ҳамаи соҳаҳо, аз ҷумла бахши хусусӣ равона шудааст.
АКС: Агентии инноватсия ва технологияҳои рақамии назди Президенти Ҷумҳурии Тоҷикистон
