Нақшаи даъвати тирамоҳии шаҳрвандони Тоҷикистон ба сафи Артиши миллӣ пурра иҷро гардид
Нақшаи даъвати тирамоҳии шаҳрвандон ба сафи Қувваҳои мусаллаҳи Ҷумҳурии Тоҷикистон дар вилоятҳо ва тамоми шаҳру ноҳияҳои мамлакат пурра иҷро гардид. Дар ин хусус аз Раёсати иттилоот ва робита бо ҷомеаи Вазорати мудофиаи Ҷумҳурии Тоҷикистон хабар доданд
Иттилоъ дода шуд, ки аз 1 октябри соли равон бо оғоз гардидани даъвати тирамоҳии шаҳрвандон ба хизмати ҳатмии ҳарбӣ дар нахустин рӯзи даъват аввалин шуда дар ҷумҳурӣ шаҳру ноҳияҳои Вилояти Мухтори Кӯҳистони Бадахшон нақшаи пешбинигардидаро пурра иҷро намуданд.
Дар баробари дигар шаҳру ноҳияҳои ҷумҳурӣ чаҳор ноҳияи шаҳри Душанбе низ яке аз аввалинҳо шуда, нақшаро пурра ба анҷом расониданд.
Масъулини шаҳру ноҳияҳои вилояти Хатлон низ бо масъулияти баланди шаҳрвандӣ иҷрои нақшаи даъватро пеш аз муҳлат амалӣ намуданд.
Вилояти Суғд ва шаҳру ноҳияҳои тобеи ҷумҳурӣ низ сари вақт ин маъракаи муҳими сиёсиро ба анҷом расониданд.
Дар шаҳру ноҳияҳое, ки масъулини мақомоти иҷроияи ҳокимияти давлатӣ ба ин маъракаи муҳими сиёсӣ таваҷҷуҳи хосса зоҳир намуда, бо бурдани корҳои фаҳмондадиҳӣ ҳамкориро бо мардум зич ба роҳ монданд, сатҳу сифати чорабиниҳои даъватӣ ва гусели шаҳрвандон ба хизмати ҳатмии ҳарбӣ хуб ба назар мерасад.
Маҳз фаъолияти назарраси бисёр комиссияҳои даъватӣ дар ташкили корҳои тарғиботию ташвиқотӣ имкон медиҳад, ки сол ба сол шумораи ҷавонони ихтиёрӣ ба сафи Артиши миллӣ равонашаванда зиёд шуда, иҷрои нақша сари вақт ва дар сатҳи баланд таъмин гардад.
АКС: Раёсати иттилоот ва робита бо ҷомеаи Вазорати мудофиаи Ҷумҳурии Тоҷикистон
