Довталабони Бадахшон ба даври чоруми Озмуни ҷумҳуриявии «Фурӯғи субҳи доноӣ китоб аст» роҳхат гирифтанд
Аз Вилояти Мухтори Кӯҳистони Бадахшон 74 довталаб ба даври чоруми Озмуни ҷумҳуриявии «Фурӯғи субҳи доноӣ китоб аст» роҳхат гирифт. Дар ин хусус аз Раёсати маорифи Вилояти Мухтори Кӯҳистони Бадахшон иттилоъ доданд.
Дар даври вилоятии Озмуни ҷумҳуриявии «Фурӯғи субҳи доноӣ китоб аст» 401 довталаб иштирок намуда, 74 нафараш ба даври ҷумҳуриявӣ роҳхат гирифтанд. Аз онҳо 13 нафар сазовори ҷойи якум, 24 нафар сазовори ҷойи дуюм ва 37 нафар соҳиби ҷойи сеюм гардиданд.
Тибқи тартиби Низомномаи озмун, даври чорум барои ғолибони ҷойҳои якум, дуюм ва сеюми даври сеюм моҳи ноябр дар Муассисаи давлатии «Китобхонаи миллӣ» баргузор мегардад. Ҳуҷҷатҳои ғолибони даври сеюм барои иштирок дар даври чорум ба комиссияи озмун то 20 сентябр пешниҳод карда мешаванд.
