Дар Тоҷикистон 724 лоиҳаи сармоягузории давлатӣ ба маблағи 152 миллиард сомонӣ амалӣ мегардад
Дар ҳафт соли охир ба Тоҷикистон беш аз 95 миллиард сомонӣ сармояи хориҷӣ ворид гардид, ки зиёда аз 30 миллиард сомонии он сармояи мустақим мебошад. Президенти Ҷумҳурии Тоҷикистон муҳтарам Эмомалӣ Раҳмон дар Паём ба Маҷлиси Олии Ҷумҳурии Тоҷикистон «Дар бораи самтҳои асосии сиёсати дохилӣ ва хориҷии ҷумҳурӣ» таъкид намуданд, ки дар ин давра дар соҳаҳои мухталифи иқтисодиву иҷтимоӣ аз ҳисоби буҷети давлатӣ ва сармояи хориҷӣ беш аз 1400 лоиҳаи сармоягузории давлатӣ ба маблағи 36 миллиард сомонӣ амалӣ гардидааст.
Ҳоло дар мамлакат 724 лоиҳаи сармоягузории давлатӣ ба маблағи умумии 152 миллиард сомонӣ амалӣ мегардад. Тибқи «Стратегияи миллии рушди Тоҷикистон барои давраи то соли 2030» ҳаҷми сармояи мустақим то соли 2026 нисбат ба маҷмуи маҳсулоти дохилӣ то 10 фоиз расонида шуда, солҳои 2022 – 2026, яъне дар панҷ сол бояд ба иқтисоди миллӣ беш аз 60 миллиард сомонӣ сармояи мустақим ҷалб гардад.
Ҳамзамон Сарвари давлат иброз доштанд, ки соли 2023 ба ташкили истеҳсолоти нави саноатӣ, васеъгардонии фондҳои асосӣ ва истеҳсоли маҳсулоти наву рақобатнок аз ҳисоби сармояи хориҷӣ ва маблағи корхонаҳо беш аз 7 миллиард сомонӣ равона гардидааст, ки нисбат ба соли гузашта 1,5 баробар зиёд мебошад.
Пешвои миллат изҳор намуданд, ки зарур аст дар ин раванд ба таъсиси ҷойҳои нави корӣ, таҳкими ҳамкорӣ бо ширкатҳои ватаниву хориҷӣ, сармоягузорон, шарикони рушд ва созмонҳои молиявии байналмилалӣ барои ташкили корхонаҳои нави истеҳсолӣ бо воридоти технологияҳои муосири каммасраф ва дар ин замина ноил гардидан ба ҳадафҳои асосии рушди иқтисодиву иҷтимоии мамлакат диққати аввалиндараҷа дода шавад. Дар робита ба ин, Ҳукумати мамлакат бояд доир ба ислоҳоти низоми ҷалби сармоя, таҳияву пешниҳод ва татбиқи самараноки лоиҳаҳои сармоягузорӣ дар бахши воқеии иқтисодиёт, бахусус дар бахшҳои саноативу агросаноатӣ тадбирҳои зарурӣ андешад.
Президенти Тоҷикистон муҳтарам Эмомалӣ Раҳмон Вазорати рушди иқтисод ва савдо ва Кумитаи давлатии сармоягузорӣ ва идораи амволи давлатиро вазифадор намуданд, ки барои баланд бардоштани имконияти сармоягузории мамлакат стандартҳои миллии экологиву иҷтимоӣ ва идоракуниро дар пешбурди фаъолияти соҳибкорӣ таҳия намоянд.
