Пешгирии коррупсия – талаби замон

Имрӯз яке аз масъалаҳое, ки ҷомеаи ҷаҳонро ба ташвиш оварда, дар роҳи амалӣ гардонидани ҳуқуқу озодиҳои инсон ва шаҳрванд монеа эҷод мекунад, коррупсия мебошад. Коррупсия ва ҷиноятҳое, ки дар умум дорои хислати коррупсионӣ мебошанд, дар қатори дигар зуҳуроти хавфноки ҷаҳони муосир, аз қабили терроризм, экстремизм ва гардиши ғайриқонунии маводи мухаддир натанҳо асосҳои давлатдориро заиф намуда, барои рушди умумимиллӣ монеа эҷод мекунанд, балки рушди иқтисодиётро боздошта, ба некуаҳволии иҷтимоӣ зарба мезананд ва суботу оромиро халадор карда, боварии мардумро ба мақомоти давлатӣ коста мегардонанд.

Коррупсия дар баробари терроризму экстремизм, паҳншавии маводи мухаддир, буҳрони ҷаҳонии иқтисодӣ ва ғайра ба яке аз таҳдидҳои глобалӣ табдил ёфтааст ва тамоми давлатҳои дунё бо ҳар роҳу восита кӯшиш мекунанд то пеши роҳи ин зуҳуротро гиранд.

Маънаи коррупсия “фасод” буда, ҳанӯз дар давраи ҳукмронии Ҳахоманишиён ба вуҷуд омада буд. Куруши Кабир ба муқобили фасод ва порахурӣ хеле мубориза бурда буд. Пора истилоҳи форсӣ-тоҷикӣ буда, аз замонҳои қадимтарин  дар истифода вуҷуд дошт. Аз забони арабӣ калимаи “ришва” вориди забони тоҷикӣ шуда, баъдан дар адабиёт он маъмул гашта, доираи истеъмоли пораро танг кард.

Дар шароити имрӯза фасод ё худ коррупсия ҳамчун вабои аср шинохта шуда, масоили муборизаю муқовимат бар зидди он аз ҷониби созмону ташкилотҳои байналмилалӣ, махсусан Созмони Милали Муттаҳид яке аз вазифаҳои аввалиндараҷа эътироф карда шудааст.

Коррупсия яке аз масъалаҳои мубрам ва доғи рӯзи ҷаҳони муосир маҳсуб ёфта, пешгирии он омӯзиши ҷиддӣ, муносибати махсус ва муқобилияти дастаҷамъонаро талаб менамояд. Дар робита ба ин, Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар паёмҳои ҳарсолаи худ, муборизаи ҳамагониро бар зидди амалҳои номатлуби коррупсионӣ таъкид карда, решакан намудани ин падидаи номатлуби ҷомеаро қарзи шаҳрвандии ҳар як фарди баору номус меҳисобанд.

Аз ҷумла, зимни ироаи Паём ба Маҷлиси Олии Ҷумҳурии Тоҷикистон аз 26 январи соли 2021 Пешвои миллат таъкид бар он доштанд, ки “Коррупсия зуҳуроти номатлуб ва барои ҷомеа хатарнок ба ҳисоб рафта, мубориза бар зидди он вазифаи асосии мақомоти давлатӣ, ниҳодҳои ҷомеаи шаҳрвандӣ ва ҳар як сокини кишвар мебошад. Аз ин лиҳоз, барои пешгирӣ кардани кирдорҳои коррупсионӣ, фароҳам овардани фазои оштинопазир ба он ва ба ин раванд ҷалб намудани тамоми мақомоти давлатӣ, воситаҳои ахбори омма ва ниҳодҳои ҷомеаи шаҳрвандӣ аз ҷониби субъектҳои мубориза бар зидди коррупсия бояд чораҷӯӣ карда шавад”.

Бояд қайд намуд, ки Ҷумҳурии Тоҷикистон дар замони соҳибистиқлолӣ қадамҳои устувори худро дар роҳи мубориза ба коррупсия гузошта, барои пешгирии ин вабои аср тамоми заминаҳои ташкилию ҳуқуқиро фароҳам овардааст.

Мубориза ба коррупсия танҳо вазифаи мақомоти зиддикоррупсионӣ набуда, балки муборизаи дастаҷамъона мебошад. Аз ин рӯ, ҳар кадоми мо – хизматчиёни давлатиро зарур аст, ки доир ба пешгирии амалҳои коррупсионӣ ва фароҳам овардани фазои оштинопазир нисбат ба чунин амалҳои номатлуб саҳмгузор бошем.

Орзу Сафаров – сардори шуъбаи таъминоти ҳуқуқӣ ва кор бо кадрҳои Хадамоти назорати давлатии энергетикӣ