Баъди 26 соли интизорӣ дастаи «Равшан»-и Кӯлоб ба финали Ҷоми Тоҷикистон-2020 баромад

Чанд лаҳза пеш дар Варзишгоҳи марказии шаҳри Кӯлоб бозии аввали нимниҳоии Ҷоми Тоҷикистон-2020  байни  дастаҳои  футболи «Равшан»-и шаҳри Кӯлоб ва «Регар-ТадАЗ»-и шаҳри Турсунзода  дар сатҳи баланд  баргузор  гардид. Дар ин вохӯрии ҷолиб  дастаи футболи «Равшан»-и шаҳри Кӯлоб дастаи  футболи «Регар-ТадАЗ»-и  шаҳри Турсунзодаро бо ҳисоби 1:0 мағлуб  намуда, баъди  26 соли интизорӣ   ба финали  Ҷоми Тоҷикистон-2020  роҳ  ёфт. Голи ягонаро аз ҳайати дастаи футболи «Равшан»-и шаҳри Кӯлоб  Абдураҳмон Нозимов ба ҳадаф расонид.

Бозии дигари нимниҳоии Ҷоми Тоҷикистон  пагоҳ,  23  сентябр дар варзишгоҳи «Пахтакор»-и шаҳри Бохтар баргузор мешавад. Дастаи  мизбон — «Хатлон»-и шаҳри Бохтар бо  дастаи «Истаравшан»-и шаҳри Истаравшан вориди сабқат мешавад.

Ёдовар  мешавем, ки  бозии ниҳоии Ҷоми Тоҷикистон-2020 бо иштироки ду дастаи ғолиби нимфинал 10  октябр дар Варзишгоҳи марказии  шаҳри Душанбе  баргузор  мегардад. Оғози бозии ниҳоӣ – соати 16:00. Бозиҳои нимниҳоӣ ва ниҳоии Ҷоми Тоҷикистон-2020 дар варзишгоҳҳо бе ҳузури тамошобинон баргузор мешаванд.

АМИТ “ХОВАР”