130 даъватшаванда аз минтақаи Рашт чун ронандаи мошинҳои гаронвазн ба сафи Артиши миллӣ шомил мегардад

 Дар рӯзи якуми даъвати баҳорӣ 130 нафар даъватшаванда аз ноҳияҳои минтақаи Рашт ҳамчун мутахассис- ронандаи мошинҳои гаронвазн ба сафи Артиши миллӣ шомил мегардад, хабар медиҳад хабарнигори минтақавии АМИТ «Ховар» Субҳониддини Маҳмуд.

Соҳибистиқлолии ҳар давлат аз доштани Артиши миллӣ маншаъ мегирад ва истиқлоли давлатӣ, бехатарии марзу буми мамлакат ба артиши пуриқтидору тавоно алоқамандии зич дорад. Артиши миллии Тоҷикистон аз имтиҳону озмоишҳои басе сангину вазнин гузашта, обу тоб ёфтааст ва имрӯз дар таъмини амнияту оромии ҷумҳуриамон саҳми арзанда мегузорад. Ҳамин аст, ки Ташкилоти ҷамъиятии мададгори мудофиаи Ҷумҳурии Тоҷикистон дар минтақаи Рашт ба неруи тавонои эҳтиётии артиш, мактаби мардонагиву ватанпарастӣ, боргоҳи омодасозии мутахассисони ҳарбиву мулкӣ ва манбаи рушди намудҳои ҳарбӣ-  техникии варзиш табдил ёфта, дар ҷалби 130 ҷавон  ба сафи Қувваҳои Мусаллаҳ дар даъвати баҳорӣ ба ҳайси мутахассис-ронанда саҳми арзанда дорад.

Тибқи иттилои сардори Мактаби автомобилии Ташкилоти ҷамъиятии мададгори мудофиа дар ноҳияи Рашт, имрӯзҳо ҷиҳати  омода намудани мутахассис-ронанда дар сафи Қувваҳои мусаллаҳи Ҷумҳурии Тоҷикистон аз ҳисоби Вазорати мудофиаи Ҷумҳурии Тоҷикистон 28 ҷавони даъватшаванда касби ронандагии дараҷаи «С»-ро хонда, ронанда гардиданд. Аз ин шумора 15 нафар аз ноҳияи Рашт, 8 нафар аз ноҳияи Лахш ва 5 нафар аз ноҳияи Сангвор мебошад, ки дар маъракаи даъвати баҳорӣ ба сафи Қувваҳои Мусаллаҳи ҷумҳурӣ шомил мешаванд.

Ҳамчунин бо ташаббуси раисони ноҳияҳои минтақа аз ноҳияҳои Лахш 26 нафар, Сангвор 9 нафар, Тоҷикобод 15 нафар, Нуробод 20 нафар ва Рашт 32 нафар ҷавонони синни даъватӣ дар давраи омӯзишӣ  касби ронандаи мошинҳои гаронвазнро  аз худ намуда, дар рӯзи якуми даъвати баҳорӣ ихтиёран  ҳамчун мутахассис ба сафи Артиши миллӣ шомил мегарданд.

АКС: Мактаби автомобилии Ташкилоти ҷамъиятии мададгори мудофиа дар ноҳияи Рашт