Президенти мамлакат Эмомалӣ Раҳмон дар ноҳияи Нуробод бинои Шуъбаи минтақавии мубориза бар зидди ҷиноятҳои муташаккили ВКД-ро ифтитоҳ намуданд
Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бинои Шуъбаи минтақавии мубориза бар зидди ҷиноятҳои муташаккили Раёсати мубориза бар зидди ҷиноятҳои муташаккили Вазорати корҳои дохилӣ дар шаҳраки Дарбанди ноҳияи Нурободро мавриди истифода қарор доданд.
Ба Пешвои миллат муҳтарам Эмомалӣ Раҳмон иттилоъ дода шуд, ки бинои шуъбаи мазкур бо назардошти тамоми шароити корӣ ва маишӣ бунёд шудааст.
Имконоту шароити бунёдгардида, барои кормандони Шуъбаи минтақавии мубориза бар зидди ҷиноятҳои муташаккили Раёсати мубориза бар зидди ҷиноятҳои муташаккили Вазорати корҳои дохилӣ дар шаҳраки Дарбанди ноҳияи Нуробод, барои фаъолияти корӣ, зиндагӣ, машқу тамрин ва обутоби бадан, инчунин сайқал додани донишҳои худ хосу мусоид буда, намунаи возеҳи таваҷҷуҳу ғамхориҳои Пешвои миллат ба кормандони милитсия ва хосатан ба мардум аст. Зеро маҳаки асосии фаъолияти кормандони мақомоти ҳифзи ҳуқуқ ин зиндагии осуда ва аҳлонаи мардум дар фазои комили суботу оромӣ, зери фазои Истиқлоли давлатии меҳан аст.
Зимни ифтитоҳи бинои мазкур Президенти кишвар муҳтарам Эмомалӣ Раҳмон бо шароити фароҳамгардида шиносоӣ пайдо намуда, таъкид намуданд, ки фаъолияти босамари мақомоти ҳифзи ҳуқуқ дар ҷомеа ҳаётан муҳим буда, муваффақияти кормандони соҳаи мазкур ба кордонӣ, донишҳои мукаммали зарурӣ, аз ҷумла сиёсӣ, оперативӣ ва фарҳанги баланди муносибат бо мардум вобастагии амиқ дорад.
Ҳукумати кишвар дар солҳои Истиқлоли давлатӣ барои таъмини шароити фаъолияти хубу натиҷабахши кормандони милитсияи тоҷик корҳои зиёди босамарро анҷом додааст ва барои оромиву таъмини волоияти қонун ва осудагии шаҳрвандон сиёсати мазкур ҳамвора зери таваҷҷууҳи Президенти кишвар қарор дорад.
Бояд зикр кард, ки дар соли ҷорӣ ин аввалин иншооти соҳа нест. Ин ҳама таваҷҷуҳу дастгириҳои Пешвои миллат ба хотири фаъолияти босамари кормандони мақомоти ҳифзи ҳуқуқ аст, ки бо мақсади таъмини ҳуқуқи шаҳрвандону меҳмонон ва волояити қонун роҳандозӣ мешавад.
