Душанбе: Фестивали байналмилалии эҷодиёти кӯдакону наврасони кишварҳои узви ИДМ оғоз шуд

Имрӯз дар шаҳри Душанбе Фестивали байналмилалии эҷодиёти кӯдакону наврасони кишварҳои узви Иттиҳоди Давлатҳои Мустақил — «Шукуфаҳои пойтахт» оғоз шуд. Фестивал дар доираи «Пойтахти фарҳангии Иттиҳод-2021» эълон гардидани шаҳри Душанбе аз 6 то 10 декабр идома меёбад. Дар ин бора қарори дахлдори Раиси шаҳри Душанбе Рустами Эмомалӣ ба имзо расидааст.

Тибқи ин қарор, нақшаи чорабиниҳои мақомоти иҷроияи ҳокимияти давлатии шаҳри Душанбе тасдиқ гардидааст. Сарраёсати молияи шаҳри Душанбе муваззаф гардидааст, ки аз ҳисоби маблағҳои барои иҷрои мақоми пойтахти Ҷумҳурии Тоҷикистон пешбинишуда ҷиҳати ташкил ва баргузории Фестивали байналмилалии эҷодиёти бадеии кӯдакон ва наврасони кишварҳои узви ИДМ – «Шукуфаҳои пойтахт» 200 000 (дусад ҳазор) сомонӣ маблағ ҷудо намояд.

Баргузории фестивали мазкур баҳри таҳкими муносибатҳои дӯстона байни кӯдакон ва наврасони соҳибистеъдоди кишварҳои узви ИДМ шароит фароҳам меорад. Ҳадаф аз баргузории фестивал омӯзиш ва арҷгузорӣ ба таъриху фарҳанг, адабиёту санъат ва тамаддуни ҳамдигарӣ ва дар ин замина мусоидат намудан дар муаррифӣ ва рушди эҷодиёти мусиқиву бадеии насли наврас мебошад.

Ба тамоми мақомоти пойтахт супориш дода шудааст, ки омодагии дуруст ба ин фестивали байналмилалиро дар сатҳи зарурӣ таъмин намоянд. Сарраёсати маорифи шаҳри Душанбе ҳамоҳангсози асосии чорабинӣ  таъйин гардидааст.

Добавить комментарий

WP Radio
WP Radio
OFFLINE LIVE