Эмомалӣ Раҳмон ва Эммануэл Макрон вазъи Афғонистонро баррасӣ карданд
Имрӯз Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Президенти Ҷумҳурии Фаронса, муҳтарам Эммануэл Макрон сӯҳбати телефонӣ анҷом доданд.
Дар оғози сӯҳбат Пешвои миллат ба Сарвари давлати Фаронса барои ташаббуси муҳокимаи масъалаҳои кунунии муносибатҳои дуҷонибаи Тоҷикистону Фаронса ва масъалаҳои мубрами рӯзномаи байналмилалӣ ва минтақавӣ изҳори сипос намуданд.
Зимни суҳбат ҷонибҳо ба мушкилоти Афғонистон ва рушди кунунии вазъи он кишвар таваҷҷӯҳ карданд. Таъкид шуд, ки амнияти минтақаи Осиёи Марказӣ бо вазъи Афғонистон алоқаманд аст.
Сарвари давлати мо бо нигаронӣ қайд кард, ки Афғонистон имрӯз бо сабаби таҳдиди воқеии мавҷи нави муқовимати шаҳрвандӣ дар кишвар дар остонаи фалокати башардӯстона қарор дорад.
Таъкид гардид, ки Тоҷикистон ҳамчун ҳамсояи наздиктарин ҷонибдори таъсиси як давлати сулҳҷӯёна ва устувор бо нақши марказии ҳамоҳангсозии СММ мебошад.
Президенти кишвар ба Президенти Фаронса дар бораи чораҳои ҷониби Тоҷикистон ҷиҳати таҳкими амнияти марзи Тоҷикистон бо Афғонистон дар партави якбора бад шудани вазъ дар Афғонистон пас аз хуруҷи нерӯҳои эътилоф аз кишвар хабар дод.
Таъмини амнияти кафолатдор дар минтақаи Осиёи Марказӣ муҳимтарин шарти рушди минбаъдаи устувори иҷтимоию иқтисодии кишварҳоямон мебошад қайд кардан Сарвари давлат.
Тарафҳо дар бораи идомаи машваратҳо оид ба масъалаҳои Афғонистон ба мувофиқа расиданд ва тасмим гирифтанд, ки ба вазирони корҳои хориҷии ду кишвар дастур диҳанд, ки дар ин масоил ҳам дуҷониба ва ҳам бисёрҷониба тамоси доимӣ дошта бошанд.
