Маҷлиси Ҳукумати Ҷумҳурии Тоҷикистон баргузор гардид

26 декабр таҳти раёсати Президенти Ҷумҳурии Тоҷикистон, Пешвои миллат, Раиси Ҳукумати Ҷумҳурии Тоҷикистон муҳтарам Эмомалӣ Раҳмон маҷлиси Ҳукумати Ҷумҳурии Тоҷикистон баргузор гардид.

Дар кори маҷлис нахуст Барномаи корҳои оморӣ барои соли 2025 ва нақшаи кори Ҳукумати Ҷумҳурии Тоҷикистон дар нимсолаи якуми соли 2025 мавриди баррасӣ қарор дода шуд.

Сипас лоиҳаҳои Барномаи давлатӣ оид ба пешгирии зӯроварӣ дар оила дар Ҷумҳурии Тоҷикистон барои солҳои 2025-2030 ва созишномаи иловагӣ ба созишномаи сармоягузорӣ байни Ҳукумати Ҷумҳурии Тоҷикистон ва Ҷамъияти саҳомии пӯшидаи «Тоҷиксемент» оид ба сохтмон ва ба истифода додани корхонаҳои истеҳсоли семент, масолеҳи сохтмонию бетонӣ ва халта аз 10 июни соли 2019 баррасӣ ва қабул гардид. Дар идомаи маҷлис масоили вобаста ба муҳоҷирати дохилии аҳолӣ аз ноҳияҳои камзамин ва сераҳолии кӯҳистон ба водиҳои дорои заминҳои бекорхобидаи ҷумҳурӣ дар солҳои 2025-2029 ва ташкил намудани Парваришгоҳи табиии давлатии «Баҳри Тоҷик» баррасӣ гардида, қарорҳои дахлдор қабул карда шуд.

Дар фароварди маҷлис вобаста ба ҷамъбаст ва натиҷагирӣ аз рушди иқтисодию иҷтимоии кишвар дар соли 2024, дар сатҳи зарурӣ ва бе мушкилот гузаронидани зимистони солҳои 2024-2025, таъмини аҳолӣ ва иншооти таъйиноти гуногун бо барқу гармӣ, истифодаи самараноки неруи барқу гармӣ ва пешгирӣ аз талафоти онҳо, дар ҳолати хуби корӣ нигоҳ доштани иншооти роҳу нақлиёт, роҳ надодан ба ҳолатҳои сӯхтор ва пешгирӣ аз ҳодисаҳои нохуш ва амалҳои номатлуб дар рӯзҳои ҷамъбасти соли 2024, расонидани кумак ба ятимону бепарасторон ва маъюбону оилаҳои эҳтиёҷманд, омодагии ҳамаҷониба ба истиқболи сазовори ҷашни байналмилалии Наврӯз ва ҷашни 35-солагии Истиқлоли давлатӣ дастуру тавсияҳо дода шуд.