Душанбе мизбони мусобиқаи байналмилалӣ оид ба футбол миёни наврасони то 15-сола
Аз 17 то 24 ноябр дар шаҳри Душанбе Чемпионати Ассотсиатсияи футболи Осиёи Марказӣ (CAFA) миёни наврасони то 15-сола доир мешавад. Дар он чор даста барои ба даст овардани унвони чемпионӣ талош менамоянд.
Дар Чемпионати CAFA-2021 миёни наврасон (U-15) дар баробари дастаи мунтахаби наврасони Тоҷикистон дастаҳои мунтахаби наврасони Эрон, Узбекистон ва Қирғизистон ширкат менамоянд. Дастаи мунтахаби Тоҷикистонро ба ин мусобиқа сармураббӣ Зайниддин Раҳимов омода мекунад.
Дар доираи чемпионат 6 бозӣ анҷом дода мешавад. Ҳамаи бозиҳо бо иштироки мухлисон дар Варзишгоҳи марказии ҷумҳуриявии шаҳри Душанбе баргузор мегарданд.
Тибқи низомнома, Чемпионати CAFA-2021 миёни наврасон мутобиқи системаи даврӣ дар як давр баргузор ва ғолиб аз рӯи холҳои бадастоварда муайян мегардад.
