МИҶГОНА САМАДОВА ДАР ҶОМИ ҶАҲОНИИ БОКС МЕДАЛИ ТИЛЛО БА ДАСТ ОВАРД
Муштзанбонуи тоҷик Миҷгона Самадова дар Ҷоми ҷаҳонии бокс миёни кишварҳои истеҳсолкунандаи нефт сазовори медали тилло шуд.
Мусобиқа бо иштироки варзишгарон аз Озарбойҷон, Миср, Конго, Гурҷистон, Белорус, Тоҷикистон, Узбекистон 5 декабр дар минтақаи Белоярски Руссия оғоз шуд ва имрӯз – 10 декабр анҷом меёбад.
Рақобатҳо аз рӯи 13 вазн миёни мардон ва 6 вазн миёни занон ҷараён гирифт.
Миҷгона Самадова дар вазни 57 кило сабқат намуда, то ба финал расидан бар муштзанҳои кишварҳои Беларус ва Руссия дастболо шуд. Ӯ дар финал бар намояндаи дигари кишвари мизбон Евгения Лочканова ғалаба ба даст овард.
Ду варзишгари дигарамон миёни бонувон – Шоира Зулқайнарова дар вазни -60кг ва Меҳриноз Музаффарова дар вазни -81кг ҷои сеюмро гирифтанд.
Миҷгона Самадова соли дуюм аст, ки ба гирифтани медали тиллои Ҷоми ҷаҳон даст меёбад. Соли гузашта низ дар ин мусобиқа Миҷгона мақоми аввалро сазовор шуда буд.
