Осорхонаи миллӣ оид ба пиряхҳо дар осорхонаи марказии вилояти Хатлон намоиши сайёр ифтитоҳ кард
Муассисаи давлатии “Осорхонаи миллӣ” ба ифтихори эълон гардидани соли 2025 – Соли байналмилалии ҳифзи пиряхҳо имрӯз дар Осорхонаи вилоятии таърихӣ-кишваршиносии «Авасто» таҳти унвони “Инъикоси пиряхҳо дар осори рассомони Тоҷикистон” намоиш ифтитоҳ намуд. Дар ин бора аз Осорхонаи миллӣ хабар доданд.
Дар ифтитоҳи намоиш намояндагони Раёсати фарҳанги вилояти Хатлон, роҳбарияту кормандони Осорхонаи вилоятии таърихӣ-кишваршиносии «Авесто», Муассисаи давлатии “Осорхонаи миллӣ”, инчунин омӯзгорон ва донишҷӯёну хонандагони муассисаҳои таҳсилоти миёна ва олии касбии шаҳри Бохтар иштирок ва суханронӣ намуданд.
Директори Муассисаи давлатии “Осорхонаи миллӣ” Иброҳимзода Зафаршо дар суханронии хеш зикр намуд, ки пиряхҳо яке аз манбаъҳои асосии обӣ дар тамоми кишварҳо ба шумор рафта, барои бо об таъмин намудани аҳолӣ, онҳо нақши муҳим доранд. Дар робита ба ин, пешниҳоди навбатии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон оид ба эълони соли 2025 – Соли байналмилалии ҳифзи пиряхҳо, иқдоми саривақтӣ мебошад, ки аз ҷониби аксари кишварҳои ҷаҳон ҷонибдорӣ ёфтааст.
Маврид ба зикр мебошад, ки кӯҳҳои осмонбӯси Ҷумҳурии Тоҷикистон манбаи бузурги пиряхҳо мебошанд. Пиряхњо дар навбати худ чун захираи дарозмуддати об ва танзимкунандаи табиии ҷараёни дарёҳо буда, яке аз бойгариҳои беҳамто ва манбаи оби ширини сарзамини зебоямон ба ҳисоб мераванд.
Зимнан дар намоиш 19 адад асар аз офаридаҳои мусаввирони кишвар ба монанди Хушвахтов Х. “Манзара”, Хошмуҳаммадов М. “Дарёи Сурхоб”, Серебрянский Б. И. “Манзара. Такоб”, Довутов З. “Сарҳади Ватан”, “Абдураҳмонов И. “Баҳор”, “Шарипов С. “Ҳушёрӣ”, Шарипов Қ. “Оби мусаффо”, Файзов К. “Пиряхи Федченко” ва “Пиряхи Бивачний” ба маърази тамошо гузошта шудаанд, ки тамошобинонро бо манзараҳои кӯҳсорон ва зебогиҳои нотакрори кишвар шинос менамоянд.
Намоиши “Инъикоси пиряхҳо дар осори рассомони Тоҷикистон” дар Осорхонаи вилоятии таърихӣ-кишваршиносии «Авесто» то рӯзи 27.10.2023 идома менамояд.
