Воридоти сармояи хориҷӣ ба иқтисодиёти Ҷумҳурии Тоҷикистон 6 925,3 миллион доллари амрикоиро ташкил дод
Дар соли 2025 воридоти сармояи хориҷӣ ба иқтисодиёти Ҷумҳурии Тоҷикистон 6 925,3 миллион доллари амрикоиро ташкил дод, ки ин нишондиҳанда нисбат ба соли 2024 ба маблағи 1 798,6 миллион доллар ё 35,1 фоиз зиёд мебошад. Дар ин бора зимни нишасти матбуотии Кумитаи давлатии сармоягузорӣ ва идораи амволи давлатии Ҷумҳурии Тоҷикистон иттилоъ дода шуд.
Султон Раҳимзода, раиси ин ниҳоди давлатӣ, дар вохӯрӣ бо рӯзноманигорон хабар дод, ки яке аз омилҳои муҳими таъмини ҷалби сармояи хориҷӣ — ин такмили заминаи меъёрии ҳуқуқӣ ва ба талаботи замони муосир мутобиқ намудани қонунгузорӣ дар самти сармоягузорӣ ба ҳисоб меравад.
Дар идома Султон Раҳимзода қайд кард, ки дар давраи ҳисоботӣ воридоти сармояи хориҷӣ аз давлатҳои аъзои ИДМ 3 031,0 миллион доллари ИМА ё 43,8 фоизи ҳаҷми умумиро ташкил дода, нисбат ба соли 2024 ба маблағи 1 067,3 млн доллари амрикоӣ ё 54,4 фоиз афзоиш ёфтааст.
Нигинаи Давронзод
Садои Душанбе
