Дар Душанбе ҷаласаи васеъи кормандони соҳаи фарҳангу ҳунари Тоҷикистон доир гардид
23 октябр дар толори Вазорати фарҳанги Ҷумҳурии Тоҷикистон бо иштироки Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Абдуҷаббор Раҳмонзода ҷаласаи васеъи соҳаи фарҳангу ҳунар баргузор гардид. Дар ин бора АМИТ «Ховар» бо истинод ба Вазорати фарҳанги Ҷумҳурии Тоҷикистон хабар медиҳад.
Дар ҷаласа роҳбарияти Вазорати фарҳанги Ҷумҳурии Тоҷикистон, роҳбарияти Кумитаи телевизион ва радио, роҳбарони муассисаҳои театрию консертӣ, раёсату бахшҳои фарҳанг дар вилоят ва шаҳру ноҳияҳо, коршиносони соҳа, оҳангсозон ва коргардонҳо иштирок намуданд.
Вазири фарҳанги Ҷумҳурии Тоҷикистон Зулфия Давлатзода ҷаласаро ҳусни оғоз бахшида, иброз дошт, ки соли 2021 кишвари мо бузургтарин чорабинии муҳими милливу сиёсӣ – 30 солагии Истиқлолияти давлатии Тоҷикистонро бо шукуҳу шаҳомат таҷлил менамояд. Ҳамчунин дар ин сол аз таъсисёбии Созмони ҳамкории Шанхай 20 сол пур мешавад ва боиси ифтихор аст, ки ҷаласаи ҷашнии Шўрои сарони давлатҳои аъзои Созмони ҳамкории Шанхай дар Тоҷикистон баргузор мегардад.
Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Абдуҷаббор Раҳмонзода дар самти иҷрои дастуру супоришҳои Ҳукумати Ҷумҳурии Тоҷикистон ибрози ақида карда, зикр намуд, ки аҳли фарҳангу ҳунарро зарур аст, то барои ҷашнҳои мазкур барномаҳои ҷолибу баландмазмун омода намоянд. Суруду мусиқӣ ва рақсҳои нав бояд эҷод шаванд, ки ҳам ҷанбаи ватандӯстона дошта бошанд ва ҳам санъати миллиро муаррифӣ созанд ва барои тарбияи шаҳрвандон дар руҳияи ҳифзи арзишҳои миллӣ саҳм гузоранд.
Аз ҷумла супориш дода шуд, ки барои дарёфти чеҳра ва истеъдодҳои нав озмунҳои гуногун байни оҳангсозон, сарояндагон, ҳунарпешаҳои рақс баргузор карда шавад.
Зимни ҷаласа инчунин масоили ташкилии чорабиниҳо, ҷалб ва ҳавасманд кардани ҳунармандон, ҳалли мушкилоти соҳа ва дигар масъалаҳои ҷорӣ мавриди баррасӣ қарор гирифтанд.
