Ба истифода додани Муассисаи таълимии хусусии “Мактаби муосири байналмилалӣ” дар ноҳияи Синои шаҳри Душанбе

01.09.2022 12:38, шаҳри Душанбе

1 сентябр Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ дар ноҳияи Синои пойтахт Муассисаи таълимии хусусии “Мактаби муосири байналмилалӣ”-ро ба истифода доданд.

Муассисаи муосири таълимӣ дар доираи дастуру ҳидоятҳои Президенти мамлакат муҳтарам Эмомалӣ Раҳмон бо иқдоми шахси саховатпешаи ватанӣ бо тарҳи муосир ва ҷавобгӯ ба меъёрҳои байналмилалӣ барои 640 нафар хонанда дар як баст бунёд ёфтааст.

Корҳои сохтмонӣ дар иншоот соли 2021 дар асоси Қарори Раиси шаҳри Душанбе оғоз гардида, бо ҷалби мутахассисону муҳандисони дохилӣ бо сатҳу сифати баланд ба анҷом расонда шудааст. Дар рафти корҳои сохтмонӣ 250 нафар бо ҷойи кор ва маоши баланд таъмин шуданд. 

Масоҳати умумии замини “Мактаби муосири байналмилалӣ” 1,4 гектарро дар бар гирифта, майдони зери сохтмон 3462 метри мураббаъро ташкил медиҳад.

Таълимгоҳ аз 4 бинои чорошёна бо таҳхона иборат буда, дорои 52 синфхонаи барҳаво, аз ҷумла кабинетҳои фаннии химия, физика, математика, астрономия, табиатшиносӣ, биология, география, синфхонаҳои лингафонӣ, нақшакашӣ, таълими меҳнати писаронаю духтарона, синфхонаҳои компютерӣ, толори мусиқиву хореографӣ, озмоишгоҳҳо, китобхона бо толори барҳавои хониш, китобхонаи электронӣ, ҳуҷраҳои корӣ барои омӯзгорону кормандон ва дигар иншооти ёрирасон мебошад.

Омӯзгорону хонандагон барои кору таҳсил дар “Мактаби муосири байналмилалӣ” дар асоси озмун қабул мегарданд ва фаъолияти муассиса дар асоси барномаи таълимии “Кембриҷ” -и Британияи Кабир амалӣ карда мешавад.

Дар мактаб барои таълиму тарбияи наврасон шароити заруриву мутобиқ ба меъёрҳои сатҳи байналмилалӣ фароҳам оварда шуда, омӯзиш дар он бо забонҳои англисӣ ва русӣ сурат мегирад.  

Озмоишгоҳҳои фаннии мактаб бо асбобу аёниятҳои дарсӣ таъмин мебошанд ва хонандагон барои дар амал гузаронидани таҷрибаҳои гуногун аз онҳо босамар истифода мебаранд. Тамоми синфхонаҳои даргоҳи нави маърифат дорои тахтаҳои электронӣ мебошанд.

Бо ифтитоҳи мактаби нав дар шаҳри Душанбе 100 нафар, аз ҷумла 50 кас ба ҳайси омӯзгор бо ҷойи кор ва маоши баланд таъмин гардиданд. 20 фоизи хонандагону омӯзгорони онро шаҳрвандони хориҷӣ ташкил медиҳад.

Ошхонаи мактаб бо 300 ҷойи нишаст дар ошёнаи якуми бинои таълимӣ қарор дошта, хонандагон ду вақт бо хӯроки гарм таъмин мегарданд. Тамоми биноҳои муассисаи муосири таълимӣ бо системаи гармидиҳӣ ва огоҳкунанда аз сӯхтор  пайваста мебошанд. 

Дар мактаб бо мақсади дар сатҳи баланд баргузор намудани ҷамъомаду чорабиниҳои гуногуни фарҳангиву оммавӣ маҷлисгоҳ бо 320 ҷойи нишаст  ташкил карда шудааст.

Ҳамчунин баҳри тарғиби тарзи ҳаёти солим ва ҷалби наврасону ҷавонон ба варзиш толори барҳавою муосири варзишӣ бунёд ёфтааст.

Дар ҳудуди муассиса ҳамзамон ду майдонча барои футболи хӯрд, волейбол ва баскетбол ташкил гардида, имкони ташкилу баргузор намудани  мусобиқаҳои гуногуни варзишӣ дар онҳо мавҷуд мебошад.

 Сарвари давлат муҳтарам Эмомалӣ Раҳмон ба сокинони саховатпешаи кишвар барои дастгирӣ аз сиёсати созандаи иҷтимоии Ҳукумати Ҷумҳурии Тоҷикистон изҳори сипосу миннатдорӣ намуда, ба омӯзгорону дигар масъулон ҷиҳати тарбияи дурусти хонандагон дар руҳияи ватандӯстиву хештаншинсоӣ бо истифода аз шароиту имконоти муҳайёгардида дар мактаби муосири хусусии байналмилалӣ дастуру супоришҳои мушаххас доданд.

Президенти Ҷумҳурии Тоҷикистон муҳтарам Эмомалӣ Раҳмон пас аз шиносоӣ бо имконоту шароити таълиму тарбияи хонандагон дар таълимгоҳи нав ба корҳои сохтмони хобгоҳи Муассисаи таълимии хусусии “Мактаби муосири байналмилалӣ” оғоз бахшиданд.

Хобгоҳ барои беш аз 270 нафар хонандагону омӯзгорони муассисаи нави таълимӣ дар шаҳри Душанбе пешбинӣ гардида, он бо тарҳи муосир ва ҷавобгӯ ба меъёрҳои замони муосир бунёд хоҳад шуд.

Дар асоси лоиҳа иншоот аз 6 ошёна иборат буда, масоҳати он 0,28 гектарро ташкил медиҳад.

Зимни муаррифии лоиҳаи иншоот иттилоъ дода шуд, ки бинои хобгоҳ давоми як соли оянда сохта мешавад ва хонандагону омӯзгорони ин даргоҳи нави маърифат бо ҷойи хоб ва истироҳату фароғат таъмин мегарданд.

Сарвари давлат муҳтарам Эмомалӣ Раҳмон зимни шиносоӣ бо лоиҳаи иншоот ва суҳбат бо бинокорону масъулон барои анҷоми босифати корҳои сохтмонӣ ва истифодаи масолеҳи аълосифати ватанӣ дар ҷараёни бунёди иншоот ба онҳо дастуру супоришҳои мушаххас доданд.