Ширкатҳои чинии «Макао Бридж Текнолоджи Лимитед» ва «Алибаба» дар Тоҷикистон намояндагӣ ифтитоҳ менамоянд

Ҷалби сармояи чинӣ ба соҳаҳои афзалиятноки иқтисодиёти Тоҷикистон, ба мисли логистика ва нақлиёт, кишоварзӣ, фарҳанг, сайёҳӣ ва дигар бахшҳои калидӣ дар мулоқоти роҳбарияти Кумитаи давлатии сармоягузорӣ ва идораи амволи давлатии Ҷумҳурии Тоҷикистон бо роҳбарон ва намояндагони ширкатҳои «Макао Бридж Текнолоджи Лимитед»- бахши ҳамкории кишварҳои Осиёи Марказӣ ва Русия, ширкати «Алибаба» ва дигар ширкатҳои Ҷумҳурии Мардумии Чин дар Душанбе баррасӣ гардид. Дар ин хусус Кумитаи давлатии сармоягузорӣ ва идораи амволи давлатии Ҷумҳурии Тоҷикистон иттилоъ медиҳад.

Роҳбарияти Кумитаи давлатии сармоягузорӣ ва идораи амволи давлатии ҷумҳурӣ ба намояндагони ширкатҳои чинӣ доир ба фазо ва имконоти сармоягузорӣ дар Тоҷикистон, имтиёзҳои сармоягузорӣ, гумрукӣ ва андозӣ маълумот пешниҳод намуд.

Намояндагони ширкатҳои чинӣ ҳавасмандии худро ҷиҳати ифтитоҳи намояндагиҳояшон дар Тоҷикистон изҳор доштанд.

АКС: Кумитаи давлатии сармоягузорӣ ва идораи амволи давлатии Ҷумҳурии Тоҷикистон