Маркази таълимии Тоҷикистон ва Чин ба фаъолият шуруъ намуд
Имсол дар Донишкадаи кӯҳию металлургии Тоҷикистон Маркази таълимии Тоҷикистон ва Чин ба фаъолият шуруъ намуд. Дар ин хусус ба АМИТ «Ховар» дар Донишкадаи кӯҳию металлургӣ хабар доданд.
Иттилоъ дода шуд, ки раёсати Донишкадаи кӯҳию металлургии Тоҷикистон бахшида ба Солҳои рушди саноат тасмим гирифтааст, ки саҳми хешро дар ин самт бо омода намудани мутахассисони соҳибкасб гузорад. Аз ин рӯ ҷиҳати омода намудани мутахассисон якчанд корҳо дар ин самт ба анҷом расонида шуданд.
Донишкадаи кӯҳию металлургии Тоҷикистон бо Донишгоҳи нафту гази Ҷумҳурии Мардумии Чин шартномаи «2+2»- ро ба тасвиб расонид, ки дар асоси он донишҷӯён ду сол дар донишкадаи мо ва ду сол ройгон дар донишгоҳи Ҷумҳурии Мардумии Чин таҳсил намуда, соҳиби диплом мегарданд.
Ёдовар мешавем, ки дар донишкада системаи дугона ё дуалӣ ҷорӣ шудааст, ки дар асоси он донишҷӯён дарсҳои амалии хешро дар зиёда аз 70 корхонаи саноатӣ мегузаранд.
