Телевизиони Бадахшон ба пахши HD гузашт
Идораи телевизион ва радиои Вилояти Мухтори Кӯҳистони Бадахшон як бахши Кумитаи телевизион ва радиои назди Ҳукумати Ҷумҳурии Тоҷикистон аст. То соли 1975 танҳо радио фаъол буд. Моҳи апрели соли 1991 дар ВМКБ телевизиони маҳаллӣ таъсис дода шуд, ки минбаъд ҳам тариқи телевизион ва ҳам радио барномаҳо пахш мешуд.
Соли 2010 бо кӯмаки Кумитаи телевизион ва радио дар кӯчаи марказии шаҳри Хоруғ як бинои дуошёна бо таҷҳизоти муосири рақами барои кормандони телевизиони маҳаллӣ дода шуд.
То соли 2010 мӯҳлати пахши барномаҳо се соат буд. Баъдан телевизион ба муддати 8 соат аз соати 19 то 2 – и нимашаб барномаҳои худро намоиш медиҳад, ки субҳи ҳамон рӯз барномаҳо такроран пахш мегарданд.
Имрӯз бошад бо иштироки Раиси Кумитаи телевизион ва радиои назди Ҳукумати Ҷумҳурии Тоҷикистон Саидзода Носир ва Раиси Вилояти Мухтори Кӯҳистони Бадахшон Мирзонабот Алишер дар доираи “Барномаи давлатии рушди телевизион ва радио дар Ҷумҳурии Тоҷикистон барои солҳои 2021-2025” дар самти ба формати рақамӣ гузаронидани шабакаҳои телевизионӣ ва радиоии давлатӣ ТВ “Бадахшон” низ ба формати пахши дақиқияташ баланд — HD гузаронида шуд.
