Кормандони Радиои Тоҷикистон ғолибони озмуни ҷумҳуриявии мақолаи беҳтарин таҳти унвони «Душанбе-ганҷе дар қалби Осиё”
Нимаи дуюми рӯзи 2 декабр дар толори Донишгоҳи технологии Тоҷикистон маросими ҷамъбастии озмуни ҷумҳуриявии “Душанбе – ганҷе дар қалби Осиё” баргузор гардид.
Озмуни мазкур бо ташаббуси Муассисаи давлатии рӯзномаи “Ҷавонони Тоҷикистон” ва Раёсати кор бо ҷавонон ва варзиши шаҳри Душанбе ба муносибати пойтахти фарҳангии ИДМ интихоб шудани шаҳри Душанбе дар соли 2021 ва 30-юмин солгарди Истиқлолияти давлатии Ҷумҳурии Тоҷикистон доир шуд.
Дар маросими ҷамъбастии он Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Гавҳар Шарофзода, вакили Маҷлиси намояндагони Маҷлиси Олии Ҷумҳурии Тоҷикистон, Шоҳзод Раҳимзода, сардори Раёсати кор бо ҷавонон ва варзиши шаҳри Душанбе, Шодихони Назар, сармуҳаррири рӯзномаи “Ҷавонони Тоҷикистон”, Маҳбуба Камолова, сармуҳаррири рӯзномаи “Народная газета”, Амонзода Илҳом, ректори Донишгоҳи технологии Тоҷикистон иштироку суханронӣ намуданд.
Чорабинӣ бо садо додани Суруди миллӣ оғоз гардид. Сипас Шодихони Назар, сармуҳаррири рӯзномаи “Ҷавонони Тоҷикистон” меҳмонон ва аҳли толорро барои иштирок дар маросими имрӯза хайрамақдам намуда, зимни баромади хеш гуфт: “Рӯзномаи “Ҷавонони Тоҷикистон” ва Раёсати кор бо ҷавонон ва варзиши шаҳри Душанбе шурӯъ аз 20 январ то 20 августи соли 2021 бахшида ба пойтахти фарҳангии ИДМ-2021 интихоб шудани шаҳри Душанбе озмуни ҷумҳуриявии “Душанбе – ганҷе дар қалби Осиё”-ро эълон намуд, ки дар он олимону адибон, журналистони касбӣ, муҳоҷирони меҳнатӣ, сокинони пойтахт ва ҳамаи онҳое, ки қобилияти эҷод карданро доранд, аз дохил ва хориҷи кишвар иштирок намуданд. Маводҳои пешниҳодшуда фарогири дастовардҳои замони соҳибистиқлолии Душанбе зери роҳбарии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва хидматҳои мондагори шаҳрдори ҷавони кишвар муҳтарам Рустами Эмомалӣ дар роҳи ба шаҳри орзуҳо табдил додани Душанбе буд”.
Сипас Абдулло Раҳмонзода, раиси Кумитаи кор бо ҷавонон ва варзиши назди Ҳукумати кишвар баромад намуда, аз ҷумла иброз дошт: “Боиси хушнудист, ки бо шарофати соҳибистиқлолӣ дар мамлакат мо ба бисёр дастовардҳои арзанда соҳиб гардидем. Бояд хотиррасон намоем, ки дар панҷ соли охир пойтахти кишварамон ба яке аз шаҳрҳои зебову аз лиҳози инфрасохторӣ рушдкарда дар минтақа ва ҷаҳон табдил ёфтааст. Бешак, давоми ҳудудан 5 соли охир мо на танҳо пойтахтамонро бо диди нав сохтусоз кардем, инчунин ҷиҳати муҳайё сохтани инфрасохтори замонавӣ иқдомҳои қобили таҳсин рӯи кор гирифтем, ки дар муаррифии миллати тоҷик нақши арзанда бозид. Ҳамчун пойтахти фарҳангии Иттиҳоди Давлатҳои Мустақил эълон шудани шаҳри Душанбе дар соли 2021 далели раднопазири ин гуфтаҳост”.
Гавҳар Шарофзода, вакили Маҷлиси намояндагони Маҷлиси Олии Ҷумҳурии Тоҷикистон зимни баромади хеш аз ободкорӣ ва зебоиҳои шаҳри Душанбе дар замони соҳибистиқлолӣ, хусусан тайи чанд соли охир ёдовар шуда, қайд намуд, ки давоми 70 соли ҳукмронии Иттиҳоди Шӯравӣ Душанбе ҳамчун деҳа боқӣ монда буд. Боиси сарфарозист, ки бо ташаббус ва иқдомҳои наҷиби Президенти маҳбуби кишвар ва шаҳрдори ҷавон имрӯз Душанбе ба як шаҳри замонавӣ ва пешрафта мубаддал гардидааст.
Дар идома аз ҷониби иштирокчиёни озмун маърӯзаҳо ироа гардид. Пас аз анҷоми қисмати расмии чорабинӣ ғолибони озмуни ҷумҳуриявии “Душанбе – ганҷе дар қалби Осиё” муаррифӣ ва қадрдонӣ гардиданд. Ҳамин тавр, дар озмуни ҷумҳуриявии “Душанбе – ганҷе дар қалби Осиё” мақоми аввалро Мансур Шоҳиён, муовини аввали директори радиои “Тоҷикистон” ба даст оварда, бо туҳфаи арзанда телевизори плазмавӣ ва ифтихорнома қадрдонӣ шуд.
Мақоми дуюмро Ҷумъахон Темурзода, хабарнигори нашрияи “Минбари халқ” соҳиб шуда, бо ноутбук ва ифтихорнома сарфароз гардонида шуд. Мақоми сеюм ба як оилаи ҷавони журналист – Хуршед Мавлонов ва Шаҳодат Давлатова, ки ҳарду дар озмун фаъолона иштирок намуда буданд, насиб шуд ва онҳо соҳиби телефони мобилӣ ва ифтихорномаи Муассисаи давлатии рӯзномаи “Ҷавонони Тоҷикистон” ва Раёсати кор бо ҷавонон ва варзиши шаҳри Душанбе шуданд.
Ба ғайр аз се ҷойи ифтихорӣ ҳамчунин панҷ нафар иштирокчии фаъоли озмун бо ифтихорнома ва мукофотпулӣ қадрдонӣ шуданд, ки онҳо Зебониссо Бобоалиева, муовини ректор оид ба тарбияи ДДЗТ ба номи С. Улуғзода, Ҳасан Азизов, муҳоҷири меҳнатӣ, Фирӯз Саймуминзода, муовини раиси Кумитаи иҷроияи ҲХДТ дар шаҳри Кӯлоб, Мирсаид Сатториён, муҳаррири шабакаи “Садои Душанбе”-и Радиои Тоҷикистон ва Беҳрӯз Холмуродов, котиби масъули рӯзномаи “Ҷавонони Тоҷикистон” мебошанд.
Дар идома сипосномаи Раёсати кор бо ҷавонон ва варзиши шаҳри Душанбе ба як қатор ВАО-и кишвар тақдим гардид. Дар фарҷоми чорабинӣ барои болидарӯҳии меҳмонону иштирокчиён барномаи фарҳангӣ пешниҳод гардид.
