“ФАЛАК”-мусиқии миллии мардуми тоҷик ҷаҳонӣ шуд
Бо азму талошҳо ва дастгирию ҳидоятҳои пайвастаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон номинаи «Фалак»- мусиқии миллии мардуми тоҷик ҷаҳонӣ ва ба Феҳристи мероси фарҳангии ғайримоддии башарият расман ворид карда шуд.
15 декабр дар ҷаласаи 16-уми Кумитаи байниҳукуматӣ оид ба ҳифзи мероси фарҳангии ғайримоддии ЮНЕСКО, ки дар шаҳри Париж тариқи онлайн баргузор гардид, номинаи «Фалак» ба Феҳристи мероси фарҳангии ғайримоддии башарият ворид шуд.
Дар ҷаласа ворид намудани унсурҳои мероси фарҳангии ғайримоддӣ, ки кишварҳои узви ЮНЕСКО ба феҳристи мероси башарият пешниҳод намудаанд, баррасӣ гардид. Номинаҳои ҷавобгӯ ба талаботи Конвенсия оид ба ҳифзи мероси фарҳанги ғайримоддӣ аз ҷониби Кумита ба феҳрист ворид гардиданд.
«Раиси Кумитаи байниҳукуматӣ оид ба ҳифзи мероси фарҳангии ғайримоддии ЮНЕСКО, котиби масъули Шри Ланка оид ба корҳои ЮНЕСКО Пунчи Ниламе Мегасват ворид гардидани номинаи «Фалак»-ро ба Феҳристи мероси фарҳангии ғайримоддии башарият расман эълон намуд» Пешниҳоди номинаи мазкур аз ҷониби Ҷумҳурии Тоҷикистон аз рӯи панҷ шарту талаботе, ки дар Конвенсия оид ба ҳифзи мероси фарҳанги ғайримоддии ЮНЕСКО таъкид шудааст, қабул гардид.
Фалак – маҷмӯи суруду мусиқии нотакрор ва санъати касбии мардуми тоҷик буда, бештар дар навоҳии кӯҳистон маъмул аст ва таърихи ниҳоят куҳан дорад.
Дар замони соҳибиситиқлолӣ аз ҷониби Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба рушду нумӯи жанри мусиқии фалак таваҷҷуҳи зиёд зоҳир карда шуда, ҳунармандони асили фалаксаро ва ансаблҳои «Фалак» дар шаҳру ноҳияҳои мамлакат пайваста дастгирию ҳавасманд гардонда мешаванд.
Бо ташаббус ва иқдомҳои Сарвари давлат муҳтарам Эмомалӣ Раҳмон 16 ноябри соли 2001 ба ансамбли «Фалак»- и назди Кумитаи телевизион ва радиои назди Ҳукумати Ҷумҳурии Тоҷикистон мақоми давлатӣ дода шуда, аз соли 2007 ҳар сол 10 октябр ҳамчун Рӯзи фалак бо тантана ва шукӯҳу шаҳомати хоса таҷлил карда мешавад.
Бо ташаббус ва иқдомҳои беназири Пешвои муаззами миллат ба феҳристи мероси фарҳангии ғайримоддии башарият ворид гардидан ва ҷаҳонию байналмилалӣ шудани «Фалак» фараҳбахштарин рўйдоди таърихию фарҳангӣ буда, дар роҳи ҳифз ва оммавӣ намудани мероси ниёгон, муаррифии ҳунарҳои мардумӣ ва фарҳанги ғанию қадимии мардуми тоҷик дар арсаи байналмилалӣ нақши муасир мегузорад.
