Дар шашмоҳаи аввали соли 2025 дар кишвар таваллуд 2,1% афзоиш ёфтааст

Дар шашмоҳаи аввали соли 2025, ба иттилои Агентии омори назди Президенти Ҷумҳурии Тоҷикистон, дар кишвар таваллуд 2,1% афзоиш ёфта, афзоиши табиӣ 18,8 нафар ба 1000 аҳолиро ташкил додааст.

Истеҳсоли маҳсулоти саноатӣ 24% афзуда, бахусус саноати истихроҷӣ — 1,7 баробар ва саноати коркард — 5% зиёд шудааст. Дар соҳаи кишоварзӣ ҳаҷми умумии истеҳсолот 9,7% афзоиш ёфта, истеҳсоли тухм 23,2%, гӯшт 11,8% ва шир 5,8% зиёд шудааст. Саршумори чорвои калону майда мутаносибан 5,4% ва 5,5% афзудааст.

Дар соҳаи нақлиёт ҳаҷми умумии боркашонӣ 9,3% ва мусофиркашонӣ 5,8% зиёд шудааст. Гардиши савдои чакана ва яклухт 9% ва ҳаҷми хизматрасониҳои пулакӣ 12,8% афзудааст. Музди миёнаи моҳонаи кормандон дар моҳи июни соли 2025 ба 3136,12 сомонӣ расида, 21,4% бештар шудааст.

Шумораи бекорон расмӣ 50,9 ҳазор нафарро ташкил дода, нисбат ба соли гузашта 3,2% зиёд шудааст.

Дар нимсолаи аввал гардиши савдои хориҷии кишвар 4731,1 млн долларро ташкил дода, 7,2% афзудааст. Аз ин ҳисоб содирот 955,3 млн доллар ва воридот 3775,8 млн  долларро дар бар мегирад. Дар нимсолаи аввали соли 2025, дар Ҷумҳурии Тоҷикистон рушди устувори иҷтимоиву иқтисодӣ ба қайд гирифта шудааст. Истеҳсоли саноатӣ ва кишоварзӣ афзуда, музди меҳнат баланд ва гардиши савдо афзоиш ёфтааст. Сатҳи таваллуд ва афзоиши табиӣ боло рафта, дар баробари ин, воридоти мол зиёд ва содирот каме коҳиш ёфтааст. Бо вуҷуди пешрафтҳо, шумораи расмии бекорон низ каме афзудааст.

Нишондодҳо гувоҳӣ медиҳанд, ки иқтисодиёти кишвар бо суръати мӯътадил рушд дошта, ба ҳалли масъалаҳои иҷтимоӣ ва таъмини аҳолӣ бо маҳсулот ва хизматрасониҳо нигаронида шудааст.

Ин нуктаро имрӯз зимни нишасти матбуоти Директори Агентии омор Ҷамшед Нурмаҳмадзода иттилооъ дод.

Шукрона Насриддинзода

Садои Душанбе