Дар шаҳраки Қалъаихум — маркази ноҳияи Дарвози Вилояти Мухтори Кӯҳистони Бадахшон сохтмони Мактаби президентӣ барои 840 хонанда дар як баст ҷараён дорад, хабар додааст мухбири минтақавии АМИТ «Ховар» Файз МИРАСАН.

Бинои мазкур то 35-солагии ҷашни Истиқлолияти давлатии Ҷумҳурии Тоҷикистон мавриди баҳрабардорӣ қарор дода мешавад. Таҳкурсии бинои Мактаби президентӣ дар маркази ноҳияи Дарвоз аввали моҳи декабри соли равон гузошта шуд. Дар ҳамин мавзеъ қаблан бинои Муассисаи таҳсилоти миёнаи умумии рақами як ҷойгир буд, ки аввали солҳои панҷоҳуми асри гузашта бунёд шуда буд.

Инак бо дастури Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои хонандагону омӯзгорони маркази ноҳия таълимгоҳи замонавӣ бунёд карда мешавад. Биное, ки ба замони муосир ва меъёрҳои байналмилалӣ ҷавобгӯ бошад.

Лоиҳаи Мактаби президентӣ аз ҷониби меъморони ширкати «Gм Партнерс» посухгӯ ба талаботи замон тарҳрезӣ шудааст. Муҳандиси сохтмон Шариф Исҳоқов иброз намуд, ки «бинои таълимгоҳ аз се ошёна иборат буда, дорои 28 синфхона, кабинетҳои фаннӣ бо тамоми таҷҳизоти зарурӣ, толори варзишӣ, маҷлисгоҳ, хобгоҳ мебошад ва барои таҳсили хонандагон дар як баст пешбинӣ шудааст.

Ҳоло дар сохтмони Мактаби президентӣ 50 нафар бинокорон аз шаҳрҳои Душанбе, Хоруғ, ноҳияҳои Дарвозу Ишкошим машғули коранд ва пас аз як моҳ теъдоди коргарон то ба 200 нафар расонда мешавад. Бештари коргарону мутахассисон аз шаҳру ноҳияҳои Вилояти Мухтори Кӯҳистони Бадахшон ба кор ҷалб гардидаанд».

Тарҳи бино мутобиқи меъёрҳои шарқию аврупоӣ дар асоси манзараҳои зебои муҳити атроф таҳия шуда, бештар аз чӯбу шиша сохта мешавад. Дар чунин синфхонаҳои барҳаво кӯдакону наврасон худро хеле роҳату ором ҳис мекунанд. Дар айни замон корҳои сохтмонӣ дар пойдевори муассисаи замонавӣ ҷараён дошта, бинокорон талош доранд, ки корҳои арматурбофию бетонрезиро то охири ҳамин моҳ ба охир расонанд.

Тибқи нақшаи Мақомоти иҷроияи ҳокимияти давлатии ноҳияи Дарвоз, бахшида ба 35-солагии Истиқлолияти давлатии Ҷумҳурии Тоҷикистон 102 иншооти хурду бузург ба истифода дода мешаванд.

АКС: АМИТ «Ховар»